Félagsráðgjafi

Viltu bæta andlega líðan þína?

Andleg líðan er grundvöllur heilbrigðs og þegar hún er ekki í jafnvægi getur það birst sem streita, kvíði, þunglyndi eða tilfinning um yfirþyrmandi álag. Að bæta andlega líðan felur í sér að vinna að því að styrkja tilfinningalega seiglu, þekkja og setja mörk, viðhalda jákvæðu sjálfstali og nýta heilbrigðar aðferðir til að takast á við áskoranir. Að leita stuðnings eða leiðsagnar, þegar þörf er á, er mikilvægt skref í átt að betri líðan.

Skólafélagsráðgjafi getur boðið þér ráðgjöf og stuðning ef þú upplifir kvíða, þunglyndi eða stress auk þess að kenna þér bjargráð og aðferðir til að takast á við erfiðar aðstæður. Ef þörf krefur, getur hann aðstoðað þig við að leita til annarra sérfræðina utan skólans t.d. sent tilvísun í sálfræðiviðtöl hjá Heilbrigðisstofnun Suðurnesja.

Viltu eiga auðveldara með að tjá tilfinningar þínar?

Að tjá tilfinningar sínar getur verið áskorun, sérstaklega ef þú hefur ekki lært að þekkja og viðurkenna þær. Ótjáðar tilfinningar geta safnast upp og valdið streitu eða misskilningi í samskiptum. Að læra að setja orð á það sem þú finnur fyrir og deila því á heilbrigðan hátt eykur sjálfsvitund þína og styrkir tengsl við aðra.

Skólafélagsráðgjafi getur aðstoðað þig við að þróa aðferðir til að tjá þig á heilbrigðan hátt, svo sem í gegnum samtöl eða skriftir. Hann getur leiðbeint þér í að þekkja og skilja tilfinningar þínar betur, svo sem reiði, sorg eða vonleysi. Í viðtölum er boðið upp á öruggt rými þar sem þú getur talað um hluti sem þú átt erfitt með að deila annars staðar. 

Er sjálfsmat þitt lágt?

Lágt sjálfsmat getur gert þig óöruggan í samskiptum og valdið því að þú vanmetur eigin getu. Það getur haft áhrif á hvernig þú tekur ákvarðanir, tekst á við áskoranir og upplifir sjálfan þig í samskiptum við aðra. Að byggja upp jákvæða sjálfsmynd krefst þess að læra að sjá styrkleika sína, horfa á mistök sem tækifæri til að læra og þróa heilbrigðar hugmyndir um sjálfan sig.

Skólafélagsráðgjafi getur hjálpað þér að finna styrkleika þína og nýta þá til að bæta sjálfsmynd þína. Hann veitir ráð um hvernig þú getur sett raunhæf markmið og viðhaldið jákvæðu viðhorfi gagnvart sjálfum þér. Með því að styðja þig í að þekkja árangur þinn og sigra, styrkist trú þín á eigin getu. 

Áttu erfitt með samskipti við aðra?

Samskipti eru grundvallaratriði í öllum mannlegum tengslum, en það getur verið áskorun að eiga opinská og árangursrík samskipti. Erfiðleikar í samskiptum geta birst sem feimni, óöryggi, erfiðleikar við að tjá tilfinningar eða skilja tilfinningar annarra. Þetta getur valdið misskilningi, ágreiningi eða jafnvel félagslegri einangrun. Að læra að setja mörk og virða mörk annarra er lykilatriði í góðum samskiptum. Með æfingu og stuðningi er hægt að þróa sterkari og árangursríkari samskipti.

Hjá skólafélagsráðgjafa getur þú fengið þjálfun í að bæta félagsfærni, t.d. að tjá tilfinningar, setja mörk eða byggja upp vináttusambönd. Ef þú lendir í átökum við einhvern, getur hann verið milligönguaðili og hjálpað þér að leysa deilur.

Er skólinn krefjandi og áttu erfitt með úthald og einbeitingu?

Þegar nám virðist tilgangslaust getur það valdið skorti á áhuga og einbeitingu, sem leiðir til minni árangurs og jafnvel óánægju. Að tengja námið við persónuleg markmið eða áhugamál getur hjálpað til við að skapa innri hvata. Það getur líka verið gagnlegt að setja sér smærri, mælanleg markmið til að gera framfarir augljósari og gefa náminu meira gildi.

Skólafélagsráðgjafi getur aðstoðað þig með bjargráð til að auka árangur í námi t.d. með því að setja raunhæf markmið og finna leiðir til að minnka álagsþætti sem hafa áhrif á líðan.

Ertu að glíma við sorg, áföll eða erfiðar heimilisaðstæður?

Áföll, eins og missir, veikindi eða fjölskylduvandi, geta haft djúp áhrif á líðan okkar. Slík reynsla getur skapað kvíða, sorg eða óöryggi. Að vinna úr áföllum krefst tíma, viðurkenningar á tilfinningum og stundum leiðsagnar. Það að fá stuðning, hvort sem er frá vinum, fjölskyldu eða fagfólki, getur gert ferlið auðveldara og hjálpað þér að endurheimta jafnvægið.

Skólafélagsráðgjafi getur veitt stuðning ef fjölskyldan þín upplifir ágreining, skilnað, fjárhagserfiðleika eða áföll. Einnig hjálpað þér að skilja tilfinningar þínar og finna styrkleika í erfiðum aðstæðum. Hann getur gengt fjölskyldu þína við úrræði utan skólans, eins og félagsþjónustu eða annað fagfólk.

Finnst þér stuðningsnet þitt veikt?

Stuðningsnet, sem getur verið samsett af fjölskyldu, vinum og öðrum í umhverfi þínu, skiptir miklu máli fyrir andlega líðan. Þegar stuðningur er takmarkaður getur það leitt til einmanaleika og aukins álags. Að byggja upp sterk tengsl við aðra skapar öryggi og veitir þér styrk í erfiðum aðstæðum. Góð samskipti, opinskátt viðmót og félagsleg þátttaka eru lykilþættir í að styrkja stuðningsnetið.

Skólafélagsráðgjafi getur hjálpað þér að greina hvaða stuðning þig vantar, hvort sem það tengist vinum, fjölskyldu eða öðrum aðilum í lífi þínu. Einnig getur hann unnið með þér að styrkja samskipti við þá sem þegar eru í stuðningsneti þínu svo sem fjölskyldu eða samnemendur. 

Ertu einmana eða upplifir félagslega einangrun?

Einmanaleiki og félagsleg einangrun geta haft neikvæð áhrif á andlega og líkamlega heilsu. Að vera einmana þýðir ekki endilega að hafa enga í kringum sig, heldur frekar að skorta djúp og merkingarbær tengsl. Til að draga úr einmanaleika er mikilvægt að byggja upp félagsfærni, opna sig fyrir öðrum og taka virkan þátt í samfélagslegum athöfnum sem vekja áhuga þinn.

Skólafélagsráðgjafi getur unnið með þér að auka sjálfsmynd þína og finna leiðir til að þú upplifir þig sem hluta af skólasamfélaginu. Einnig veltir hann upp með þér mögulegum leiðum til að kynnast öðrum s.s. í gegnum skólastarf eða félagasamtök. Skólafélagsráðgjafi getur miðlað samskiptum milli þín og kennara eða annarra starfsmanna skólans ef þú átt í erfiðleikum með eitthvað svo sem að mynda tengsl við nýja samnemendur. Ef vandinn er flóknari, getur hann stutt þig í að leita eftir frekari aðstoð t.d. frá sérfræðingum utan skólans. 

Áttu erfitt með að biðja um hjálp?

Að biðja um hjálp getur verið erfitt, sérstaklega ef þú ert vanur að takast á við vandamál sjálfur eða finnst það merki um veikleika. Það er hins vegar merki um styrk að viðurkenna takmarkanir sínar og leita eftir stuðningi þegar á þarf að halda. Að læra að tjá þarfir sínar skýrt og leita aðstoðar getur leitt til betri lausna og dýpri tengsla við aðra.

Skólafélagsráðgjafi getur kennt þér hvernig þú getur tjáð þarfir þínar og beðið um aðstoð þegar þörf krefur. Einnig að hjálpa þér að yfirstíga óöryggi sem hindrar þig í að leita til kennara, vina eða fjölskyldu um aðstoð. 

Enginn vandi er of stór eða lítill til að leita eftir aðstoð

Það er eðlilegt að eiga í erfiðleikum með að deila vandamálum sínum, sama hvort þau virðast "smávægileg" eða "of stór" til að takast á við. Hins vegar er mikilvægt að vita að allir erfiðleikar eru gildir og eiga rétt á athygli og lausn. Það að ræða við einhvern getur létt á tilfinningalegu álagi og hjálpað til við að finna nýjar leiðir til að takast á við aðstæður. Hvort sem vandinn tengist tilfinningum, samskiptum, námi eða persónulegum aðstæðum er fyrsta skrefið að deila honum með traustum aðila sem getur stutt þig.

Skólafélagsráðgjafi býður þér öruggt rými þar sem þú getur rætt hvers kyns vanda og fengið stuðning, án þess að vandinn sé metinn sem of "lítill" eða "stór". Aðalatriðið er að þú skiptir máli og ávallt er hægt að leita lausna saman.