VÉLS1VA04(AV) - Vélstjórn 1

Lýsing

Í áfanganum öðlast nemendur þekkingu á uppbyggingu og virkni mismunandi vélagerða þar sem áhersla er lögð á uppbyggingu, eiginleika og notkun bulluvéla. Einnig er farið yfir íhluti og einingar sem brunavél er gerð úr og hlutverk þeirra. Þá er fjallað um véla- og lagnakerfi sem þjóna brunavélum. Nemendur þjálfast í notkun véla og vélakerfa, bæði í verklegri þjálfun og í vélhermi. Lögð er áhersla á að nemendur verði færir um að þjóna og stjórna vélbúnaði í minni skipum. Farið er yfir öryggismál, umgengni um vélar, ásamt hættum sem stafa af vélum og vélbúnaði. 

Nemandi skal hafa öðlast þekkingu og skilning á:

• vinnuhring tví- og fjórgengisvéla
• flokkun aflvéla eftir gerð, uppbyggingu og eldsneyti
• grundvallarhugmyndum að baki bulluvélinni, byggingu hennar og helstu íhlutum
• mismunandi uppbyggingu, notkun og eiginleikum hraðgengra og hæggengra bulluvéla
• mismunandi aðstreymi eldsneytis og lofts í dísilvél
• þeim kerfum sem þjóna vélum skipa, hlutverki þeirra og uppbyggingu í minni skipum
• kæliþörf brunavéla
• olíukerfi skipa og einstökum þáttum, frá daghylki að eldsneytisloka
• uppbyggingu á eldsneytisdælum og vinnumáta þeirra

Nemandi skal hafa öðlast leikni í að:

• nafngreina helstu íhluti vélar og lýsa hlutverki þeirra
• lesa úr vélateikningum
• nota viðeigandi handverkfæri á réttan hátt
• ganga um vélar með tilliti til hreinlætis og öryggis
• búa til gátlista og undirbúa tvígengis- og fjórgengisskipsvélar fyrir gangsetningu og gangsetja þær
• ganga frá vél og vélarúmi eftir stöðvun og gera vélarúm frostklárt

Nemandi skal geta hagnýtt þá þekkingu og leikni sem hann hefur aflað sér til að:

• teikna upp vinnuhring tvígengis- og fjórgengisvéla og lýsa ferlinu
• rekja og teikna upp helstu vélakerfi
• stunda vinnu í vélarúmi skipa m.t.t. umgengni og öryggismála
• undirbúa dísilvél fyrir ræsingu og ræsa hana
• greina kerfisbundið bilanir í vél skips og bregðast við þeim á viðeigandi hátt
• lýsa virkni vélkerfa og samspili þeirra í keyrslu véla