VÉLF2VB04(BV) - Vélfræði 2

Lýsing

Í þessum áfanga læra nemendur hvernig orkan í eldsneytinu breytist m.a. í hreyfiorku og varmaorku og hvernig hún nýtist til að knýja skipið áfram. Farið verður í reykgreiningu afgass og orkutap. Þeir læra um grunnþætti gufukatla, notkun eimtafla og eimframleiðslu. Nemendur læra að útleiða formúlur sem koma fyrir í námsefninu, útskýra gildi breytnanna í formúlunum og beita þeim á viðeigandi hátt við lausn verkefna.

Nemandi skal hafa öðlast þekkingu og skilning á:

• Sankey línuritinu, hlutverki þess og notkun
• umbreytingu á orku við notkun brunavéla og varmajöfnuði
• nýtingu orku í brunavélum og nýtingu orku við að knýja skip áfram
• sveigju skipsskrúfu, skrikun hennar, skrúfulínuriti, afkastalínuriti
• neðra og efra varmagildi olíu og aðferðum við mælingu varmagildis
• fullkomnum bruna og orsökum ófullkomins bruna
• eldsneytisnotkun bulluvéla og orkudreifingu
• fræðilegri loftþörf, loftaukatölu og raunverulegri loftþörf brunavéla og katla
• notkun eims við aflfærslu, notkun á eimtöflum, myndunarvarma og nýtni katla
• mismun á vatnsrörakatli og reykrörakatli
• aflþörf dælukerfa (dælna)
• kennilínu miðflóttaaflsdælu

Nemandi skal hafa öðlast leikni í að:

• gera grein fyrir fjölbreyttum vélfræðilegum viðfangsefnum með notkun stærðfræði
• nota mismunandi vélfræðilegar mælieiningar við útreikninga
• reikna út aflþörf, orkunýtingu og varmajöfnuð véla
• gera grein fyrir notkun eims við aflyfirfærslu
• útskýra hugtök eins og myndunarvarma og nýtni katla
• nota eimtöflur og varmaflæðilínurit

Nemandi skal geta hagnýtt þá almennu þekkingu og leikni sem hann hefur aflað sér til að:

• útleiða formúlur sem fyrir koma í námsefninu, útskýra gildi breytanna í formúlunni og beita þeim við lausn verkefna
• gera tillögur varðandi val á vélum, kötlum og ýmsum vélbúnaði skipa
• skýra neðra og efra varmagildi olíu og aðferðir við mælingu varmagildis
• leggja mat á gögn varðandi bruna eldsneytis, svo sem fullkominn bruna og ófullkominn bruna
• skýra eldsneytisnotkun bulluvéla og orkudreifingu
• nýta kennilínur og aflþörf dælna við val á búnaði