STÝR3GC05 - Stýritækni 3

Lýsing

Í áfanganum eru kynnt helstu stýrikerfi sem notuð eru í iðnstýringum, þ.e. segulliðastýringar, loftstýringar, rafeindastýringar og iðntölvustýringar og farið dýpra í segulliðastýringar, þ.e. kraft- og stýrirásir, heldur en gert var í STYR1A5. Farið er yfir virkni og notkun yfirálagsvarna, mótorvarrofa og varnarbúnaðar sem notaður er í kraft- og stýrirásum. Haldið er áfram með teikningar og staðla sem og kennslu teikniforrita fyrir segulliðastýringar (t.d. Acad og/eða PCschematic). Farið er yfir notkun tengilista og tengilistanúmera, strengja- og víramerkingar. Kynntar eru nokkrar ræsiaðferðir rafmótora, svo sem Y/D-ræsing, Dahlander-ræsing, bein ræsing og mjúkræsingar. Námið í áfanganum byggist að miklu leyti á verkefnavinnu og verklegum æfingum þar sem nemendur brjóta verkefni til mergjar, tengja, prófa og mæla og taka saman niðurstöður. Lögð er áhersla á að nemendur nýti sér mælitæki til að finna tengivillur og bilanir.

Nemandi skal hafa öðlast þekkingu og skilning á:

• helstu stýrikerfum sem notuð eru í iðnstýringum
• notkun og virkni á yfirálagsvörnum fyrir rafmótora, mótorvarrofa og varnarbúnað sem notaður er í tengslum við kraft- og stýrirásir
• notkun og virkni endastoppsrofa, flotrofa og neyðarstoppsrofa
• notkun og virkni á þrýstiliðum og segullokum
• notkun á tengilistum og tengilistanúmerum
• notkun á merkingum, þ.e. víra- og strengjamerkingum

Nemandi skal hafa öðlast leikni í að:

• nota nokkrar ræsiaðferðir fyrir rafmótora
• nota teikniforrit fyrir stýrirása- og kraftrásateikningar

Nemandi skal geta hagnýtt þá almennu þekkingu og leikni sem hann hefur aflað sér til að:

• framkvæma bilanaleit í segulliðastýringum
• skilja upplýsingar af skiltum rafmótora
• tengja stýri- og kraftrásir skammhlaups-mótora