SMÍÐ1VA04(AV) - Málmsmíði 1 - Handavinna, grunnur

Lýsing

Nemendur skulu öðlast þjálfun í notkun og meðferð verkfæra og verkstæðisbúnaðar, fá tilfinningu fyrir nákvæmni mælitækja, notkunarsviði þeirra og takmörkunum. Nemendur fái þjálfun í smíði eftir teikningum og þekkingu til að velja smíðamálma og meðhöndla þá á réttan hátt við vinnu sína. Einnig þjálfist þeir í að beita helstu verkfærum og vinnuaðferðum við málmsmíðar, svo sem að saga, slípa, sverfa, bora, snitta og nota snitt og snúningshraðatöflur.  

Nemandi skal hafa öðlast þekkingu og skilning á eftirfarandi:

• almennum skilgreiningum á járni, stáli, járnsteypu, riðfríu stáli, áli og öðrum málmum
• notkunarsviði, umhirðu og viðhaldi handverkfæra og tækja sem notuð eru til viðhalds og viðgerða á vélbúnaði
• helstu mælitækjum sem notuð eru í málmiðnaði til beinna og óbeinna mælinga
• uppbyggingu og notkun spóntökuvéla
• helstu aðferðum og verkfærum við járnsmíðar
• vinnsluhæfni smíðastáls, áls og riðfrís stáls

Nemandi skal hafa öðlast leikni í að:

• vinna með handverkfærum og málmsmíðavélum
• vinna eftir einföldum teikningum, smíða hluti sem standast öll mál
• meta og velja efni sem hentar til smíði hverju sinni
• beita mælitækjum, svo sem rennimáli

Nemandi skal geta hagnýtt þá þekkingu og leikni sem hann hefur aflað sér til að:

• velja öryggisbúnað sem hentar verkefnum og aðstæðum hverju sinni
• lesa sig til um eiginleika málma úr efnis stöðlum
• velja málmtegundir eftir stöðlum og ákveða hvaða efni hentar best fyrir mismunandi aðstæður
• segja til um helstu möguleika og helstu eiginleika málma
• velja samsetningaaðferðir (lóðun, suða, boltun og líming)
• velja tæki og búnað sem hentar mismunandi smíðaefnum