NÆRI2NH05 - Næringarfræði - Næringarfræði fyrir einka- og styrktarþjálfara

Lýsing

Í þessum áfanga verður farið í næringu almennings og íþróttafólks. Áhersla er lögð á hagnýta þekkingu fyrir einka- og styrktarþjálfara s.s. orkuþörf, þyngdarstjórnun, átröskun, fæðubótarefni og árangursaukandi efni, orkuinnihaldi og næringargildi mataræðis auk mikilvægi þess að neyta næringarríkrar fæðu. Farið verður yfir tískustrauma í mataræði og hvernig mataræðið tengist lífsstílstengdum sjúkdómum.

Nemandi skal hafa öðlast þekkingu og skilning á:

• ráðleggingum um mataræði fyrir íþróttafólk
• matvælalöggjöf á Íslandi og reglur um merkingar matvæla og forsendur sem þurfa að liggja að baki fullyrðingum á umbúðum
• helstu einkennum íslensks mataræðis og matarmenningar og hvaða næringartengdu atriði þarf að huga að
• helstu fæðubótarefnum á markaðnum í dag
• helstu tískustraumum í mataræði
• mismunandi orkuþörf fólks og skilning á andlegum og líkamlegum þáttum sem hafa áhrif á matarhegðun s.s. átröskun og lífsstílstengdum sjúkdómum
• mögulegum hindrunum sem fólk í yfirþyngd er að glíma við í tengslum við mataræði og hugsanlegum lausnum við þeim hindrunum
• fæðuofnæmi og fæðuóþoli
• fyrirbyggjandi ráðleggingum um mataræði fyrir ýmsa lífsstílstengda sjúkdóma s.s. hjarta- og æðasjúkdóma, krabbamein, sykursýki og beinþynningu

Nemandi skal hafa öðlast leikni í að:

• reikna út orkuþörf og hlutföll orkuefnanna
• lesa og skilja innhaldslýsingar matvæla og miðla upplýsingum til skjólstæðinga
• reikna grunnorkuþörf, heildarorkuþörf, próteinþörf og líkamsþyngdarstuðul

Nemandi skal geta hagnýtt þá almennu þekkingu og leikni sem hann hefur aflað sér til að:

• tengja þekkingu sína á líkamsstarfseminni og þörfum líkamans á næringu við líðan og árangur í daglegu lífi, starfi, skóla og íþróttum
• geta rökstutt eigin ráðleggingar varðandi mataræði til skjólstæðinga sinna m.t.t. þarfa og markmiða skjólstæðingsins
• útskýra hvað má betur fara varðandi næringu skjólstæðinga út frá útreikningum á orkuþörf og samsetningu fæðunnar
• að taka þátt í gagnrýnum umræðum um tískustrauma og markaðssetningu, kosti og ókosti einstakrar fæðu, fæðubótarefna og árangursaukandi efna
• afla sér vísindalegra heimilda um árangursaukandi efni og skoða hvaða efni mæta kröfum um gæði og virkni