INNK2HH05 - Inniklæðningar

Lýsing

Í áfanganum er fjallað um létt byggingavirki innanhúss með áherslu á útfærslur og klæðningu veggja, lofta og gólfa. Gerð er grein fyrir uppsetningu einstakra grindar- og klæðningakerfa, efnisnotkun, festingum, einangrun, áhöldum, tækjum og vinnu-aðferðum. Nemendur læra um smíði léttra innveggja úr blikkstoðum, klæðningu þeirra með gipsplötum, uppsetningu niðurhengdra kerfislofta og lagningu mismunandi parkets Sérstök áhersla er lögð á útfærslur og frágang á léttum byggingavirkjum í votrými. Áfanginn er bæði ætlaður húsa- og húsgagnasmiðum og kennslan er að mestu bókleg þar sem m.a. er farið í heimsóknir í fyrirtæki.

Nemandi skal hafa öðlast þekkingu og skilning á:

• smíði innréttinga
• smíði glugga og útihurða
• framleiðsluferli innréttinga, glugga og hurða
• notkun efna til framleiðslu innréttinga, glugga og hurða
• öryggisreglum og öryggisbúnaði við framleiðslu innréttinga
• hvernig vali á innanhússklæðningum og útfærslu þeirra er háttað
• helstu tækjum og aðferðum við innanhússklæðningar
• efnum sem notuð eru við smíði innréttinga, hurða og glugga
• viðarspæni og plastefnum sem notuð eru til spónlagningar
• plötuefni og límtré sem notað er í innréttingar og innihurðir
• framleiðslu málaðra innréttinga úr MDF-plötum
• notkun glers, málma og dúka í smíði innréttinga og innihurða
• smíðisfestingum og fylgihlutum
• helstu samsetningaraðferðum á innréttingum og innihurðum
• mismunandi lími og límingaraðferðum við spónlagningu
• mismunandi yfirborðsmeðferð á innréttingum og innihurðum
• smíðaefnum sem notuð eru við gerð glugga og útihurða
• samhengi milli snúnings-, skurðar- og mötunarhraða og yfirborðsgæða
• samsetningaraðferðum á gluggum og útihurðum
• yfirborðsmeðferð glugga og útihurða
• gagnvörn smíðaviðar og efnum til yfirborðsmeðferðar
• öryggisreglum og öryggisbúnaði við fúavörn og yfirborðsmeðferð
• algengustu burðarkerfum fyrir niðurhengd loft og uppsetningu þeirra
• hvernig á að leggja parket á stein og tré innanhúss
• helstu gerðum af gegnheilu og fljótandi parketi og eiginleikum þeirra
• efnum og áhöldum sem notuð eru við lagningu og slípun parkets

Nemandi skal hafa öðlast leikni í að:

• setja upp, smíða og meðhöndla innréttingar, glugga, hurðir og inniklæðningar
• nota málma og plast við smíði glugga og útihurða
• setja upp og klæða létta kerfisveggi innanhúss
• velja smíðisfestingar og fylgihluti
• velja límtegundir og límingaraðferðir fyrir mismunandi viðartegundir
• nota vélar og verkfæri við ofantalda verkþætti
• meðhöndla skaðleg efni

Nemandi skal geta hagnýtt þá þekkingu og leikni sem hann hefur aflað sér til að:

• öðlast innsýn í bygginga- og brunamálareglugerð sem varðar innréttingar, glugga, hurðir og inniklæðningar
• skipuleggja framleiðsluferli
• velja viðeigandi efnissamsetningar og smíðisfestingar
• öðlast innsýn í tæknilega viðarvernd við smíði útiglugga og útihurða