IÐTE1VB04(AV) - Iðnteikning 1 - Fríhendisteikning, grunnur

Lýsing

Í áfanganum er lögð áhersla á að nemendur öðlist almenna undirstöðuþekkingu og þjálfun í teiknifræðum. Áfanginn skiptist í tvo megin efnisþætti. Í fyrri efnisþætti er fjallað um fallmyndun, en í þeim seinni flatarteikningu og yfirborðsútflatninga. Gert er ráð fyrir að nemendur öðlist færni í lestri og gerð vinnuteikninga, gerð flatarmynda og útflatninga. Nemendur skulu öðlast færni í meðferð og notkun mæli- og teikniáhalda, myndrænni vinnu með viðfangsefni starfsgreina, lestri teikninga og fá grunnþjálfun í gerð vinnuteikninga og útflatninga. Áfanginn er undirbúningur fyrir fagbundið nám í teiknifræðum og lestri vinnuteikninga. Kenna þarf áfangann samkvæmt STCW alþjóðasamþykktinni með viðeigandi vottun. Nám í áfanganum (og undanfarandi áföngum ef við á) skal samsvara þeim kröfum sem gerðar eru í tilteknum hlutum samþykktarinnar eins og nánar er tilgreint í tilvísanalista sem fylgir námsbrautar-lýsingunni.

Nemandi skal hafa öðlast þekkingu og skilning á:

• upplýsingamiðlun og tæknilegum teikningum
• hornréttum fallmyndum ásamt sneiðmyndum af einföldum hlutum
• málsetningu og hlutföllum teikning
• þrívíðum teikningum og sönnum stærðum skurðflata
• reglum, stöðlum og venjum sem gilda um vinnuteikningar

Nemandi skal hafa öðlast leikni í að:

• nota teikni- og mæliáhöld.
• gera vinnuteikningar með teikniáhöldum af einföldum hlutum með hornréttum fallmyndum og sneiðmyndum
• hugsa af nákvæmni um og vinna myndrænt með viðfangsefni starfsgreina, s.s. hönnunar og iðngreina
• gera útflatningsmyndir og finna raunstærðir skurðarflata á sívalningum, keilum og fleiri þrívíðum formum
• skipuleggja, árita og ganga frá einföldum tæknilegum teikningum og miðla upplýsingum á skilvirkan hátt

Nemandi skal geta hagnýtt þá almennu þekkingu og leikni sem hann hefur aflað sér til að:

• lesa teikningar
• vinna einfaldar tæknilegar vinnuteikningar og einfaldar þrívíðar teikningar
• finna sannar stærðir útflatninga og teikna þrívíð form og finna sannar stærðir skurðarflata
• undirbúa sig fyrir fagbundið teikninám og annað fagnám starfsgreina, s.s. hönnunar- og iðngreina