HKLI1GB03 - Klipping 1

Lýsing

Nemandinn kynnist grunnatriðum kennslukerfis hársnyrtinámsins við klippingu á æfingahöfði og tileinkar sér helstu hugtök. Áhersla er lögð á að horfa og hugsa eins og hönnuður, að þekkja helstu hönnunarþættina og grunnformin fjögur sem notuð eru við klippingu: jafnsítt form, fláa, auknar og jafnar styttur. Nemandinn kynnist mikilvægi smitvarna og helstu öryggisþátta. Hann fær að auki grunnþjálfun í gerð og notkun verklýsinga og í meðferð og beitingu áhalda og tækni við klippingu.

Nemandi skal hafa öðlast þekkingu og skilning á:

• því kennslukerfi sem unnið er eftir og hvernig það er notað við hönnun og framkvæmd klippinga
• hugtökunum hverfipunktur, jafnsítt, flái, auknar og jafnar styttur og þeim hárformum sem hugtökin tákna
• helstu áhöldum sem notuð eru við klippingar
• helstu smitleiðum

Nemandi skal hafa öðlast leikni í að:

• klippa æfingahöfuð dömu og herra, einnig vanga og hnakkatopp í jafnsítt form, auknar og jafnar styttur auk fláa
• gera verklýsingu fyrir klippingu

Nemandi skal geta hagnýtt þá almennu þekkingu og leikni sem hann hefur aflað sér til að:

• hafa gott vald á greiðu, skærum og þynningarskærum og á samspili blásara, bursta og greiðu
• sjá samhengi í verklýsingu og því verki sem hún stendur fyrir
• þekkja ólík form í hársnyrtingu og hafa vald á aðferðum til að ná þeim fram