FÓTF3FS03 - Fótaaðgerðafræði 3

Lýsing

Skilgreind eru sjúkdómseinkenni í fótum sem eru til orðin vegna sykursýki, forsendur þeirra og afleiðingar. Fjallað er um minnkað tilfinningaskyn og blóðflæði í fótum, hreyfigetu, tauga- og liðkvilla, æða- og blóðrásarkvilla, fótasár og aflimanir. Nemendur læra að skoða fætur sykursjúkra, skráningu og skýrslugerð. Þeir læra að gera ýmsar mælingar, s.s. tónkvíslarmælingu, monofilament-mælingu, blóðflæðis- og æðasláttarmælingu, húðhitamælingu o.fl. Nemendur læra að skoða ástand liða, tauga- og æðakerfis fóta, réttstöðu, óeðlilegar gönguhreyfingar og að þekkja einkenni Charcot-fótarins. Farið er í hvað ber að varast við meðferð sykursjúkra, sýkingahættu, meðferðarúrræði, hlífðarmeðferð og sáraumbúnað. Enn fremur er lögð áhersla á eftirlit og teymisvinnu, fótabúnað og forvarnir, félagslegar og efnahagslegar aðstæður sykursjúkra, fræðslu og ráðgjöf.

Nemandi skal hafa öðlast þekkingu og skilning á:

• orsökum helstu fótameina sem hrjá sykursjúka.
• mikilvægi forvarna.
• mismunandi aðstæðum skjólstæðings sem geta krafist mismunandi eftirfylgni.

Nemandi skal hafa öðlast leikni í að:

• greina helstu orsakir fótameina hjá sykursjúkum.
• gera og skrá mælingar sem tengjast snertiskyni, blóðflæði og liðum sykursjúkra.
• útskýra mikilvægi forvarna.

Nemandi skal geta hagnýtt þá almennu þekkingu og leikni sem hann hefur aflað sér til að:

• meðhöndla helstu fótamein hjá sykursjúkum.
• ákveða meðferðarúrræði og verið meðvitaður um hvað ber sérstaklega að varast við meðferð fóta sykursjúkra.
• skilgreina sjúkdómseinkenni í fótum sykursjúkra.